बागमती प्रदेश सरकारमा मन्त्रालयको भागबन्डा टुंगियो

हेटौंडा / बागमती प्रदेश सरकारमा मन्त्रालयको भागबन्डा टुंगो लागेको छ। हेटौँडामा भएको शीर्ष नेताहरूको सहमति अनुसार एक सभामुखसहित कुल आठ मन्त्रालयको विभाजन गरिएको हो।
​सहमति अनुसार नेकपाले सभामुखका साथै आर्थिक मामिला तथा योजना मन्त्रालय र खानेपानी, ऊर्जा तथा सिँचाइ मन्त्रालय पाउने भएको छ। त्यसैगरी, नेकपा (एमाले) ले मुख्यमन्त्रीसहित भौतिक पूर्वाधार विकास मन्त्रालय र आन्तरिक मामिला, कानुन तथा सहकारी मन्त्रालय लिनेछ। एमालेकै तर्फबाट उपसभामुख पद भने यथावत रहनेछ।
​यस्तै, राष्ट्रिय प्रजातन्त्र पार्टी (राप्रपा) को भागमा तीन वटा मन्त्रालय परेका छन्। राप्रपाले स्वास्थ्य तथा सामाजिक विकास मन्त्रालय, कृषि तथा पशुपन्छी विकास मन्त्रालय र उद्योग, पर्यटन, श्रम तथा यातायात मन्त्रालय सम्हाल्ने सहमति भएको छ। यो सहमतिसँगै बागमती प्रदेश सरकार विस्तारको बाटो खुलेको छ।