थाहा बसपार्क सञ्चालनमा : नगर प्रमुख विष्णु बिष्टबाट सेवाको औपचारिक शुभारम्भ

मकवानपुर, थाहा — लामो समयदेखि माग गरिएको थाहा बसपार्क अखेर सञ्चालनमा आएको छ। थाहा नगरपालिका–४ नार्खुढाँडमा निर्माणाधीन बसपार्क आज (कार्तिक १९ गते)देखि औपचारिक रूपमा सञ्चालनमा आएको हो। शिखरकोट बजार क्षेत्रको मुख्य सडकमार्गमै सवारी साधन सञ्चालन हुँदा बढ्दै गएको दुर्घटनाको जोखिम, पार्किङको समस्या र अव्यवस्थित यातायात व्यवस्थापनका कारण स्थानीय युवाहरूले लामो समयदेखि दवाब दिइरहेका थिए। अन्ततः सोही दवाब र निरन्तर पहलपछि थाहा नगरपालिकाले बसपार्क सञ्चालनमा ल्याएको हो।​
आज एक औपचारिक समारोहका बीच थाहा नगरपालिकाका प्रमुख विष्णु बिष्टले बसपार्कबाट सेवा शुभारम्भ गर्दै बसपार्क सञ्चालनको सुरुवात गरे। कार्यक्रममा नगर उपप्रमुख भरत गोपाली, वडा अध्यक्ष नारायण लामा, विभिन्न राजनीतिक दलका प्रतिनिधि, उद्योग वाणिज्य संघका पदाधिकारी तथा स्थानीयवासीको उल्लेख्य उपस्थिति थियो।​
🔹 नगर प्रमुख बिष्ट : “ठेकेदारको ढिलासुस्तीका कारण बसपार्कले पूर्णता पाउन सकेन”

​
कार्यक्रमका प्रमुख अतिथीसमेत रहेका नगर प्रमुख विष्णु बिष्टले बसपार्क सञ्चालन कार्यविधिअनुसार गरिएको बताउँदै यस कार्यमा स्थानीय युवाहरूको योगदान उल्लेखनीय रहेको बताए। उनले भने,
“थाहा बसपार्क निर्माण लामो समयदेखि जारी थियो, तर ठेकेदारको ढिलासुस्तीका कारण समयमै काम सम्पन्न हुन सकेन। अब बाँकी भौतिक संरचना छिटो सम्पन्न गर्न संघीय सरकारलाई घच्घच्याउनेछौं।”
नगर प्रमुख बिष्टले बसपार्कको सञ्चालनबाट शिखरकोट बजार क्षेत्रमा सवारी व्यवस्थापनमा सहजता आउने र दुर्घटनाको जोखिम घट्ने विश्वास व्यक्त गरे। साथै उनले स्थानीय युवाहरूको सुझाव र मागलाई ध्यानमा राख्दै बसपार्क सञ्चालनको निर्णयमा नगरपालिका पुगेको स्पष्ट पारे।

​
🔹 नगर उपप्रमुख गोपाली : “बसपार्क नगरकै गौरवको प्रतीक”
थाहा नगर उपप्रमुख भरत गोपालीले बसपार्क सञ्चालन नगरकै गौरवको विषय भएको उल्लेख गर्दै यससँगै नयाँ चुनौतीहरू पनि थपिएको बताए। उनले भने,
“बसपार्क सञ्चालनसँगै व्यवस्थापन, सुरक्षासँग सम्बन्धित चुनौतीहरू पनि आउँछन्। तर हामी यातायात व्यवसायी, स्थानीय समुदाय र निजी क्षेत्रसँग सहकार्य गरेर समाधानतर्फ अघि बढ्नेछौं।”
उनले थपे, “नगरपालिकाका पूर्वाधारहरूमध्ये बसपार्क अत्यावश्यक अंग हो, जसले यातायातको केन्द्रीय व्यवस्थापनमा मद्दत पुर्‍याउनेछ।”
🔹 स्थानीय युवाको पहल र सहकार्य   ​
 युवाहरूले विगत एक वर्षदेखि नै बसपार्क सञ्चालनका लागि नगरपालिका र सवारी व्यवसायीहरूसँग निरन्तर छलफल र दबाब दिइरहेका थिए। उनीहरूको सोही प्रयासका कारण अन्ततः नगरपालिकाले यो निर्णय कार्यान्वयनमा ल्याएको हो। स्थानीय युवाहरूका अनुसार सवारी साधनहरू बजारभित्रै पार्किङ गर्दा भीडभाड र दुर्घटनाको सम्भावना बढिरहेकोले स्थायी बसपार्क अपरिहार्य बनेको थियो।
🔹 पूर्वाधार र सेवा सुविधा  ​
हाल बसपार्कमा बिजुली जडान, खानेपानी, सार्वजनिक शौचालय, यात्रुका लागि कुर्सी, सवारी पार्किङ क्षेत्र लगायतका आधारभूत पूर्वाधारहरूको व्यवस्था भइसकेको छ। नगरपालिकाका अनुसार बाँकी संरचनाहरू – जस्तै आधुनिक ट्रमिनलका संरचनाहरू पनि क्रमशः निर्माणाधीन छन्।
बसपार्कबाट हालका लागि यात्री बाहक बस, सुमो, इभि लगायतका सवारी साधनहरू छुट्न थालेका छन्। ​
🔹 कार्यविधिअनुसार सात सदस्यीय समिति गठन
थाहा नगरपालिका कार्यपालिकाको बैठकले स्वीकृत गरेको “थाहा नगर बसपार्क सञ्चालन तथा व्यवस्थापन कार्यविधि, २०८०” का आधारमा बसपार्क सञ्चालन गरिएको हो। उक्त कार्यविधिअनुसार बसपार्क नगरपालिकाको मातहतमा रहनेछ र सात सदस्यीय व्यवस्थापन समिति गठन हुनेछ।
सो समितिमा नगरप्रमुखको सिफारिसमा अध्यक्ष, एक सचिव, एक कोषाध्यक्ष, साथै यातायात व्यवसायी, उद्योग वाणिज्य संघ र उपभोक्ता प्रतिनिधि रहने व्यवस्था गरिएको छ। समितिले बसपार्कको शुल्क निर्धारण, व्यवस्थापन, र दैनिक सञ्चालनका कार्यहरू गर्नेछ।
🔹 स्थानीयको खुशी ​
लामो समयदेखि बसपार्क सञ्चालनको प्रतीक्षा गरिरहेका स्थानीयवासीले अब थाहा नगरको सवारी व्यवस्था व्यवस्थित हुने विश्वास व्यक्त गरेका छन्। थाहा–४ का स्थानीयवासी लबकुमार केसी भन्छन्,
“हामीले धेरै पटक यो विषयमा आवाज उठाएका थियौं। अब बसपार्क सञ्चालनमा आएपछि बजार क्षेत्र भीडरहित र सुरक्षित हुनेछ।”
🔹 उद्घाटन समारोहमा व्यापक सहभागिता ​
थानाबजार व्यवस्थापन समितिका अध्यक्ष रामबहादुर खत्रीको सभापतित्वमा सम्पन्न समारोहमा नगर प्रमुख विष्णु बिष्ट, उपप्रमुख भरत गोपाली, वडा अध्यक्ष नारायण लामा, उद्योग वाणिज्य संघका अध्यक्ष पुरुषोत्तम ढकाल, नेपाली कांग्रेसका नगर उपसभापति नवराज कार्की, नेकपा एमाले नगर अध्यक्ष सुरेन्द्रमान प्रधान, माओवादी केन्द्रका नगर अध्यक्ष विनोद कुमार लामा, राप्रपा नगर अध्यक्ष कुलमान तामाङ,नारायणी यातायात व्यावसायि संघ पालुङका प्रतिनिधी अरुण लामा,नरेन्द्र अधिकारी,सुमो सेवाका काउन्टर इन्चार्ज सानोकाजी कार्की,थाहा नगर रोजगार संयोजक कुमार नेगी,थाहा नगरपालिकाका सामाजिक बिकास अधिकृत अनिल लामिछाने यातायात व्यावसायि,बजार व्यवस्थापन समितिका पदाधिकारी लगायतका अतिथीहरूको सहभागिता रहेको थियो।
कार्यक्रममा इलाका प्रहरी कार्यालय पालुङका प्रमुख रुक्सा बज्राचार्य, भूमि आयोगका पूर्व जिल्ला अध्यक्ष ज्योति रायमाझी, मालपोत कार्यालय शिखरकोट प्रमुख टंक प्रसाद आचार्य, नापी कार्यालयका प्रमुख पुरुषोत्तम नगरकोटी, विभिन्न संघसंस्थाका प्रतिनिधि तथा स्थानीय बासिन्दाको उल्लेख्य उपस्थिति थियो।​
समारोहमा ऋषेश्वर महिला खैचडी भजन समूहका महिलाहरूले आकर्षक भजन प्रस्तुत गरेका थिए।
थाहा बसपार्क सञ्चालनसँगै थाहा नगरको यातायात व्यवस्थापनमा नयाँ अध्याय सुरु भएको छ। यसले नगर क्षेत्रमा सवारी पार्किङ, यात्रु सुविधा, र बजार व्यवस्थापनमा सहजता ल्याउने अपेक्षा गरिएको छ। स्थानीय युवाको निरन्तर पहल, नगरपालिकाको निर्णय र समुदायको सहकार्यले अन्ततः थाहा नगरवासीको लामो प्रतीक्षा समाप्त गरेको छ।बसपार्क निर्माणको योजना पहिलो पटक २०७४ सालमा निर्वाचित जनप्रतिनिधिहरूले अघि बढाएका थिए। त्यसअघि २०७१ सालमै थाहा नगरपालिकाले बसपार्क निर्माणका लागि आर्थिक वर्ष २०७१/०७२ मा ५० लाख रुपैयाँ विनियोजन गरी स्थानीय पूर्वाधार साझेदार कार्यक्रममार्फत कार्य थालनी गरेको थियो।
‎
‎थानाबजार नजिकै रहेको करिब ४८ रोपनी क्षेत्रफलमा निर्माणाधीन बसपार्कलाई नगरको गौरवको आयोजना मानिएको छ। करिब ३० लाख रुपैयाँको प्रारम्भिक लगानीबाट सुरु गरिएको यो आयोजना अहिले बहु–संरचना समेटिएको आधुनिक बसपार्कका रूपमा अगाडि बढाइने योजना छ।
‎मकवानपुरको थाहा नगरपालिका–४, नार्खुढाडमा २०७५ मंसिर ९ गते   औपचारिक रूपमा शिलान्यास गरिएको थियो। करिब सात करोड २१ लाख रुपैयाँ लागतमा बन्ने बसपार्कको पहिलो चरणमा टर्मिनल भवन, बगैँचा, रेष्टुरेन्ट, सफ्टिङ स्टल, अपाङ्गमैत्री शौचालय, सवारी चालकका लागि विश्राम कक्ष, ग्यारेज, प्रहरी बिट, सडक, सडक बत्ती लगायतका संरचना निर्माण हुने छ।
‎
‎सि एन्ड ब्रदर्स कन्स्ट्रक्सनले उक्त कामको ठेक्का पाएको थियो। नेपाल सरकारको सहरी विकास मन्त्रालयअन्तर्गतको सघन सहरी तथा भवन निर्माण आयोजना चितवनले ‘एकीकृत सहरी पूर्वाधार विकास आयोजना’ अन्तर्गत ७ करोड २१ लाखमा ठेक्का पाएर निर्माण गरिरहेको थियो तर हाल ठेकेदार बेपत्ता रहेको छ।
‎
‎२०९१ साल भदौ २० गते सम्पन्न गरिसक्ने गरी २०७९ चैत २९ गते सम्झौता गरिएको भए पनि सम्झौता अनुसारको भौतिक प्रगति अझै देखिएको छैन।

​​​​