शंकरज्योति माविमा वाटर फिल्टर तथा डिस्पेन्सर हस्तान्तरण

हेटौडा,२४ मकवानपुर /सिमलटारमा अवस्थित शंकरज्योति माध्यमिक विद्यालयलाई टोल विकास संस्था नगर समन्वय समिति, हेटौंडा उपमहानगरपालिकाको आयोजनामा आयोजित २५ औं स्थापना दिवस तथा रजत महोत्सव-२०८२ को विशेष अवसरमा ईलेक्ट्रिक वाटर फिल्टर तथा डिस्पेन्सर प्रदान गरिएको छ।

विद्यालय परिसरमा आयोजित विशेष समारोहका बीच समितिका अध्यक्ष ध्रुव प्रसाद अधिकारीले विद्यालयका प्रधानाध्यापक महेश रिजाललाई सामग्रीहरू हस्तान्तरण गर्नुभयो।

अध्यक्ष अधिकारीले सो अवसरमा बोल्दै भन्नुभयो, “टोल विकास संस्था नगर समन्वय समितिले समाज रुपान्तरणका विभिन्न पक्षहरूमा समर्पित भावनाले काम गर्दै आएको छ। शिक्षण संस्थामा स्वच्छ पिउने पानीको पहुँच हुनु विद्यार्थीहरूको स्वास्थ्य र सिकाइ दुवैका लागि महत्वपूर्ण हुन्छ। संस्थाले गरिरहेको यस्ता साना प्रयासहरू सामूहिक प्रभावका हिसाबले निकै अर्थपूर्ण छन्।”

कार्यक्रममा विद्यालयका प्रधानाध्यापक महेश रिजालले टोल विकास संस्था नगर समन्वय समितिप्रति आभार प्रकट गर्दै भन्नुभयो, “स्वस्थकर पानी पिउन पाउनु हरेक विद्यार्थीको आधारभूत आवश्यकता हो। यस किसिमको सहयोगले विद्यार्थीहरूलाई स्वस्थ राख्न, सिकाइमा प्रेरणा दिन र विद्यालयको वातावरण अझ सकारात्मक बनाउन सघाउनेछ।”

कार्यक्रममा विद्यालयका शिक्षक रोशन पराजुली, टोल विकास संस्था नगर समन्वय समितिकी उपाध्यक्ष सति न्यौपाने, उपहासचिव देवकुमार श्रेष्ठ, सचिव चन्द्रावति पनेरू, टोल विकास संस्था वडा समन्वय समिति, हेटौंडा–११ का अध्यक्ष यज्ञबहादुर आचार्य लगायतको उपस्थिति थियो।
उक्त कार्यक्रममा सहभागी सबैले यस्ता सामाजिक उत्तरदायित्वमूलक कार्यहरूको निरन्तरता आवश्यक रहेको धारणा राखेका थिए। टोल विकास संस्था नगर समन्वय समितिले स्वास्थ्य, सरसफाइ, वातावरणीय संरक्षण, महिला सशक्तिकरण, साइबर सुरक्षाबारे जनचेतना र युवालाई लक्षित विभिन्न कार्यक्रमहरू सञ्चालन गर्दै आएको छ।
कार्यक्रमले विद्यालय र समुदायबीचको सहकार्यलाई अझ बलियो बनाउने विश्वास समेत व्यक्त गरिएको थियो।