बिचौलियाहरुको संरक्षणका लागि नै कांग्रेस र एमाले को सरकार

बैशाख २२,हेटौंडा:- नेकपा (माओवादी केन्द्र) का उपाध्यक्ष नन्दकिशोर पुनले नेपालको अहिलेको राजनीतिक अबस्था डामाडोल भएको बताएका छन् । वर्तमान सरकार संख्याको हिसाबले दुई तिहाइ भए पनि देशमा सुशासन कायम हुन नसकेको उनले बताए ।

सोमबार हेटौंडामा योङ कम्युनिष्ट लिग (वाईसीएल) मकवानपुरको पाचौं जिल्ला सम्मेलनलाई सम्बोधन गर्दै उनले सरकारका गतिविधिका कारण दलाल पुजीपतिहरुको मनोबल उच्च भएको जिकिर गरे। भ्रष्टचारीहरुलाई कारबाही गर्नुको सट्टा संरक्षणमा सरकार लागेको उनको आरोप छ । पूर्वउपराष्ट्रपति पुनले बिचौलियाहरुको संरक्षणका लागि नै कांग्रेस र एमालेको सरकार बनेको टिप्पणी गरे ।
उपाध्यक्ष पुनले देशको अर्थतन्त्र नाजुक अवस्थामा रहेको बताए । केही अदृष्य शक्तिहरुले राज्य संयन्त्रहरुलाई घेराबन्दी गरेर अर्थतन्त्रलाई ध्वस्त बनाएको उनको भनाइ छ । उनले ती शक्तिहरुको सञ्जाल संविधान, सरकार, न्यायपालिका सबैतिर व्यापकरुपमा फैलिएको जिकिर गरे । देशको राष्ट्रियतामाथि हस्तक्षेप गर्ने हस्तक्षेपकारीहरु संग ती शक्तिहरुको साठगाठ रहेको उनले उल्लेख गरे ।

उपाध्यक्ष पुनले आफू २ पटक उपराष्ट्रपति हुदा ती सञ्जालहरुलाई चिनिसकेको दाबी गर्दैै देश बचाउन त्यस्ता अदृष्य शक्तिको सञ्जाललाई तोड्नुपर्ने बताए। उपाध्यक्ष पुनले गणतन्त्र जोगाउने प्रमुख जिम्मेवारी माओवादीको भएकोसमेत बताए । कांग्रेस र एमालेले माटोमा पुरिसकेको संविधानसभालाई माओवादीको १० वर्षे सशस्त्र जनयुद्धले ब्युताएको उनले दाबी गरे ।