बिश्व उपभोक्ता अधिकार दिवस २०८२ : चित्लाङमा अन्तरक्रिया तथा अभिमुखिकरण कार्यक्रम सम्पन्न

मकवानपुर — बिश्व उपभोक्ता अधिकार दिवस २०८२ को अवसरमा थाहा नगरपालिका–९ चित्लाङस्थित चित्लाङ रिसोर्टमा अन्तरक्रिया तथा अभिमुखिकरण कार्यक्रम सम्पन्न भएको छ। कार्यक्रमको आयोजना उद्योग, वाणिज्य तथा उपभोक्ता हित संरक्षण निर्देशनालय हेटौंडाले गरेको हो भने सह–आयोजनामा उद्योग तथा वाणिज्य कार्यालय मकवानपुर रहेको कार्यक्रमको अध्यक्षता उद्योग, वाणिज्य, भूमि तथा प्रशासन मन्त्रालयका सचिव जीवलाल भुसालले गर्नुभएको थियो भने कार्यक्रममा प्रमुख अतिथि बागमती प्रदेशका उद्योग, वाणिज्य, भूमि तथा प्रशासन मन्त्री बिन्दु श्रेष्ठको उपस्थिति रहेको थियो। त्यसैगरी विशिष्ट अतिथिहरूमा थाहा नगरपालिकाका प्रमुख विष्णु बिष्ट, इन्द्रसरोवर गाउँपालिकाका अध्यक्ष देवकृष्ण पुडासैनी तथा थाहा नगरपालिकाका उपप्रमुख भरत गोपाली रहनुभएको थियो।
कार्यक्रममा निर्देशनालयका निर्देशक यादवनाथ आचार्य, उद्योग तथा वाणिज्य कार्यालय मकवानपुरका प्रमुख रामप्रसाद भुसाल, थाहा नगर उद्योग वाणिज्य संघका अध्यक्ष पुरुषोत्तम ढकाल लगायत विभिन्न सरोकारवाला निकायका प्रतिनिधिहरूको उल्लेखनीय उपस्थिति रहेको थियो।
कार्यक्रमको उद्देश्यबारे उद्योग तथा वाणिज्य कार्यालयका प्रमुख रामप्रसाद भुसालले प्रकाश पार्दै उपभोक्ता अधिकार संरक्षण, बजार अनुगमन सुदृढीकरण तथा सचेतना अभिवृद्धि गर्ने लक्ष्य रहेको बताउनुभयो। त्यसैगरी राष्ट्रिय उपभोक्ता अधिकार मञ्चका अध्यक्ष प्रेमलाल महर्जन र उपभोक्ता हित संरक्षण मञ्चका उपाध्यक्ष बासु खतिवडाले उपभोक्ता अधिकार सम्बन्धी कार्यपत्र प्रस्तुत गर्दै वर्तमान चुनौती र समाधानका उपायहरूबारे जानकारी गराउनुभयो।
निर्देशनालयका निर्देशक यादवनाथ आचार्यले निर्देशनालयबाट उपभोक्ता अधिकार प्रवर्द्धनका लागि गरिएका गतिविधिहरूबारे प्रस्तुती दिनुहुँदै बजार अनुगमन, जनचेतना कार्यक्रम तथा गुनासो व्यवस्थापन प्रणालीलाई प्रभावकारी बनाउँदै लगिएको बताउनुभयो।
कार्यक्रममा बोल्दै थाहा नगर प्रमुख विष्णु बिष्ट, इन्द्रसरोवर गाउँपालिकाका अध्यक्ष देवकृष्ण पुडासैनी तथा थाहा नगर उद्योग वाणिज्य संघका अध्यक्ष पुरुषोत्तम ढकालले उपभोक्ता हित संरक्षणका लागि स्थानीय तह, निजी क्षेत्र र सरोकारवाला निकायबीच सहकार्य आवश्यक रहेको धारणा व्यक्त गर्नुभयो।
कार्यक्रमका प्रमुख अतिथि मन्त्री बिन्दु श्रेष्ठले उपभोक्ता अधिकार संरक्षण सरकारको प्राथमिकतामा रहेको उल्लेख गर्दै बजारमा हुने ठगी, कालोबजारी तथा गुणस्तरहीन वस्तुको नियन्त्रणका लागि कडा अनुगमन गरिने बताउनुभयो। उहाँले “उपभोक्ता सचेत भए मात्र अधिकार सुनिश्चित हुन्छ, त्यसैले राज्यले नीति तथा कानुन बनाउने मात्र होइन, त्यसको प्रभावकारी कार्यान्वयनमा पनि जोड दिनेछ,” भन्नुभयो। साथै, उपभोक्ताको हितमा काम गर्ने निकायहरूलाई थप सशक्त बनाउँदै सेवा प्रवाहलाई सहज र पारदर्शी बनाउनेतर्फ सरकार प्रतिबद्ध रहेको धारणा व्यक्त गर्नुभयो।
कार्यक्रमले उपभोक्ता अधिकार संरक्षण, सचेतना अभिवृद्धि तथा सरोकारवाला निकायबीच समन्वय सुदृढ गर्ने विश्वास लिइएको आयोजकले जनाएको छ।