निर्धन उत्थान लघुवित्त पालुङ शाखाको सामाजिक उत्तरदायित्व:वीमा रकम वितरण

मकवानपुर — निर्धन उत्थान लघुवित्त वित्तीय संस्था लिमिटेड, पालुङ शाखाले आफ्नो सामाजिक उत्तरदायित्व अन्तर्गत वीमा क्षतिपूर्ति रकम वितरण गरेको छ।
मकवानपुर जिल्लाको थाहा नगरपालिका–५ खर्कस्थित खर्क महिला समाजकी सदस्य स्वर्गीय मनमाया घिसिङको असामयिक निधनपछि, संस्थाले कर्जा वीमा बापत रु. ५ लाख ८५ हजार रकम उनका श्रीमान राजकुमार घिसिङलाई चेकमार्फत हस्तान्तरण गरेको हो।
कार्यक्रम थाहा नगरपालिकाका वडा अध्यक्ष विष्णु बहादुर गुरुङको प्रमुख आतिथ्यमा सम्पन्न भएको थियो। सो अवसरमा उनले ग्रामीण क्षेत्रमा लघुवित्त संस्थाले समाज परिवर्तन तथा ग्रामीण जीवनस्तर उकास्न खेलेको भूमिकाबारे धारणा व्यक्त गरेका थिए।
शाखा प्रमुख वीरबहादुर लामा तामाङले वीमा क्षतिपूर्ति सम्बन्धी जानकारी गराउँदै सदस्यहरूलाई यस्ता सेवाबाट लाभ लिन आग्रह गरे। कार्यक्रमको सञ्चालन शाखाका लेखापाल नवराज भट्टराईले गरेका थिए।
निर्धन उत्थान लघुवित्तले विपन्न वर्गलाई लक्षित गर्दै वित्तीय सेवा प्रदान गर्दै आएको छ भने यस्ता वीमा कार्यक्रममार्फत सदस्यहरूको आर्थिक सुरक्षामा टेवा पुर्‍याउँदै आएको छ।